شخصيتي مع اهل زوجي

هلا خواتي واخواني
بصراحه ما اعرف كيف ابتدي
بس ببدا
لي زوج ماهو قوي الشخصيه بس احس باوقات اني انا الي ضعيفه
اهل زوجي كلهم شخصياتهم قويه وانا من وانا صغيره شخصيتي ماهي قويه وايد بس في فتره صاره وايد قويه وهالفتره هي قبل ما اتزوج
ولما تزوجت سالت زوجي ليش انا بالذات الي اخترتني قال لانج قويه شخصيتج وانا اريد وحده تكون جي عشان تقدر تتاقلم مع اهلي
بس الي صار اني مب قادره لين الحين اتاقلم معاهم وانا كملت سنتين من زواجي
في اوقات احس بقصه واكره نفسي لاني مب قادره حتى اقول الي في خاطري من بينهم لانهم كل شي ينتقدونه
وانا حامل ولما اروح عندهم اكون جوعانه حتى ما اقدر اقول لخدامتي حطيلي اكلمش خوفا منهم بس تقدير للاكبر سننا كيف اكل وهم ما كلوا بس في نفس الوقت ما اقدر استحمل اني انتظر لاني حلمل واحس بالجوع وزياده اني عندي فقر دم ونقص فيتامينات فلازم اتغذى عدل
وماني عارفه كيف اتعامل معاهم
الله يخليكم عطوني اراكم في قصتي
مع العلم ان شخصيتي مع اهلي لين الحين قويه وممكن اغير اي شي اريده وابدي راي في اي شي

الغاليه الموضوع مش بقوه الشخصيه ولا شي

الموضوع وببساطه تقدرين تكسبينهم بطيبتك وقلك واخلاقك وتعاملك ... اول شي خلينا نبتدي بالمهم ..

حطي عندج بالغرفه ثلاجه صغيره حطيها وجبات صغيره تصبيره .. مثل فواكه مكسرات .. سندويشات .. اول شي لان الحامل لازم تاكل وجبات صغيره على فترات متباعده .. عشان ما يصيدها الغثيان ولا يصيدها مغص.. وتلبك معوي ..

وثاني شي حبيبتي مش الشخصيه القويه هي الي بتخلي لك مكان .. دايما الناس الكبار ينشرون بالكلمه الطيبه والحلوه .. لمن تحسسينهم انهم لهم الرأي الاول والاخير .. وان رأيهم يهمك ,, وان كلامهم على عينك وراسك .. هالشي .. بالعكس راح يحطون لك اعتبار بكل شي ,, وراح يكونون معاج وراح يكون لرأيك صوت عندهم ومهم بعد ..

انا مادري بشنو يفكر زوجك لمن قال عشان شخصيتك قويه .. انتي مو داشه حرب الشيخه .. انتي داشه بيئه مختلفه وتعاملهم مختلف .. وبعدين انتي ما بتعيشين عندهم طول عمرج .. فشي مهم انك تتركين انطباع ممتاز عنك . يقولون والله مرت فلان كانت عندنا .. وخوش بنت .. وهكذا

عزيزتي لمن تحسين في تدخل بحياتك .. ممكن تفرضين رأيك بطريقه ترضي الطرفين وما تزعلين فيها احد .. السياسه .. هي افضل الحلول .. وحطي ببالج هم كبار يعني دائما تفكيرهم بيختلف عن تفكيرج ونادرا ما بتلاقي معاهم .. فلا تزعلين وتشيلين هم اذا هم مب مقصرين معاج بشي ...

اتمنى فكرتي تلاقي استحسان عندك

ام جنى

اذا انتي شخصيتك من قبل قوية مااعتقد الي تعانين منه مع اهل زوجك ضعف شخصية
يمكن لانك للحين ماتعودتي عليهم
واذا تعودتي ان شاء الله راح تتكملين عادي معاهم وتقولين رايج بكل صراااحة
وعن الاكل مثل ماقالت الاخت من اجنى لازم يكون عندج اكل في الغرفة خاص فيج مو لازم اذا بغيتي تاكلي تتطلعين المطبخ

اختي الغاليه
الانسان مو بقوة الشخصيه الانسان بأسلوبه واحترامه للاخرين راح يتحترمونه
وعامليهم مثل ماتعاملين اهلج
وبخصوص الجوع اكلي قبل لا تروحين لهم توست ومارتديلات وخس وطماط
او
فواكه تفاح برتقال موز فراوله عنب
او
اي شي تحبينه يعني روحي لهم تكونين شبعانه على ما يوصل موعد الاكل

لان موحلو تاكلين والناس بعد ماكلوا

والله يهنيج ويسعدج ان شاءالله ويرزقج ربي الذريه الصالحه
اللهم امين




دمتم سالمين
اختكم شريفة

مبروك الحمل اولا ثانيا انا مع كلام اختي ام جنى وام عبادي القمر


بعدين بالنسبه للاكل ممكن تقولين للشغاله تصلح حلى او كيك وتجيبه لكم وانتم جالسين تشربون قهوه او شاهي والله يعينك ويصبرك يارب

اتضح من كلامك ان الموضوع ماله دخل بالشخصيه لان الشخصيه هي وحده عند اهلك او عند اهل زوجك ..

المشكله باين انك إلى الان ماتعودتي عليهو ولا أخذتو على بعض وإلى الان بينكم رسميات ..

حاولي انك تكسري الحواجز الي بينكم ...

وتكونون مثل الاهل مابينكم رسميات ...


وشخصيتك قويه لكن الحواجز هي الي تعيقك شوي ,,,,


والله يسهل لك وعينك ويوفقك ,,,

اختي الحبيبه اعتقد وهذا رأيي انك متخوفه من التعامل معهم بشكل طبيعي

والسبب يعود للصوره اللي في بالك عنهم

ربما يكونون اقوياء الشخصيه ولكن هذا ليس سبب لعدم الانسجام الذي تحسبن به

نصيحتي ان تسمحي لنفسك الحقيقه بالظهور ويكفي سنتين من الاختباء

ان كنت محترمه في تعاملك مع اهلك فهاكذا ستكونين معهم

حاولي ان تكوني طبيعيه فهذا افضل لك ولاداعي للرسميات

اتمنى لك التوفيق