أتجوز خطيبي اللي بيحبني.. ولا أتجوز حبيبي؟

أولا: أنا بحب موقعكم جدا لأنه فعلا موقع ممتاز، ثانيا: أنا عندي مشكلة ومش لاقية حد أتكلم معاه فيها، عشان كده قررت إني أكتب لكم ويا رب ألاقي عندكم الحل.

أنا مشكلتي إني طول عمري كنت باحلم إني أحب وأتحب وأرتبط بالإنسان اللي أحبه، وفعلا أنا كنت متعلقة بشخص جدا وكنت بافكر فيه قوي، بس هو كان دايما بيتجاهلني وعمري ما قلت له إني باحبه ولا هو قال لي أي حاجة.

في الوقت ده اتقدم لي شخص أهله على معرفة بأهلي، وهو شخص من وجهة نظر أهلي كويس، وقالوا لي كفاية إننا عارفين أهله، يعني ضامنينه، وبصراحة أنا كنت حاسة إني مجروحة، لأني متعلقة بحد ومش حاسس بيّ، فوافقت على العريس، لأن أهلي أقنعوني بيه رغم إن في فرق في التعليم بينه وبيني.

أنا خريجة جامعة وهو دبلوم، وعمري ما حلمت إني آخد واحد معاه دبلوم، لأني كنت دايما باقول إنه هايبقى في فرق في التفكير، وده فعلا اللي لاقيته، هو خطبني وقعد معايا تقريبا شهر وسافر، لأنه شغال بره، وكل كلامنا عن طريق النت، هو بيحبنى جدا وقال لي إنه كان بيحبني من زمان.

المشكلة إن حصلت بيننا مشاكل كتير، بسبب التفكير هو تفكيره غير تفكيري خالص، مش عاوزني أكلم أي حد، بيغير من أصحابي ومن قاريبي، ماعندوش حاجة اسمها إن في بنت تكلم ولد ومايبقاش في بينهم أي حاجة، وأنا بحكم إني دخلت الجامعة، كان ليّ أصحاب وزمايل ولاد باسلم عليهم عادي لما باشوفهم وهو طبعا مش عاجبه ده.

المهم حصلت بيننا مشاكل كتير أوي، وأنا في الأول أقنعت نفسي إني بحبه وبعدين مع كُتر المشاكل حسيت إني مش بحبه ولا هو ده الإنسان اللي باتمنى أعيش معاه وأكمل حياتي معاه، وفي الوقت ده أنا اتعرفت على واحد على النت، هو إنسان فيه كل حاجة حلوة في، الأول أنا كنت باكلمه مجرد تسلية مش أكتر، وبعدين لاقيت نفسي باتعلق بيه.

وبعدين مع مرور الوقت اتعود إني أكلمه، ولو يوم مش كلمته كنت باتجنن، وأنا مش قلت له إني مخطوبة، وهو قال لي إنه بيحبني وأنا باعشقه وبحبه قوي وماقدرش استغنى عنه لأني لاقيت فيه كل حاجة حلوة.

المشكلة إني حددت معاد فرحي على خطيبي وهو مايعرفش وعاوز ييجي يخطبني، ولو قلت له إني مخطوبة هيبعد عني وأنا مش عارفة أعمل إيه من غيره، ومش عارفة هاتجوز إزاي حد وأنا بحب حد تاني خالص.

أنا غلطت من الأول إني كلمت حد غير خطيبي بس ده حصل وأنا حبيته لأني لاقيت فيه كل حاجة حلوة حلمت بيها وباتمنى أعيش معاه، بس أنا خلاص هتجوز خطيبي، ومش عارفة أقول لحبيبي إني مخطوبة بس هو مش هيسامحني، ولا أتجوز خطيبي لأنه بيحبني؟

بس أنا لما باقعد أفكر وأتخيل إني ممكن أبقى في حضن خطيبي باتعب، لأني مش بحبه، وساعات باقول كفاية إنه بيحبني وأنسى الإنسان اللي عرفته من النت، وأقول لربنا يسامحني وأبدأ حياتي مع خطيبي وأحاول أحبه وأنا باحاول أمنع نفسي إني أكلم الإنسان التاني بس مش باعرف باكون هاتجنن لو يوم مش كلمته.. حاسة إني بحبه بجد.

أنا محتاره قوي يا ريت تقولوا لي أعمل إيه المفروض إن فرحي بعد شهر وإني باجهز كل حاجة، وخطيبي قرب ييجي من السفر واللي بحبه عاوز ييجي يخطبني، أنا بجد مش عارفة أعمل إيه يا ريت تساعدوني وتقولوا لي أعمل إيه وآسفة إني طولت عليكم ويا ريت تردوا عليّ في أسرع وقت وشكرا ليكم.

حقيقي أنت في وضع صعب جدا، كان الله في عونك أو كما يقولون وضع لا تحسدين عليه، فأنت بين ما تتوهمين عنه أنه الجنة والنار، أو كما يقولون بين شقي الرحى، وهذا هو الصواب، فلا جنة في الأمر على الإطلاق، فكلاهما نار ستحرقك لا محالة.

النار الأولى: نار الحب المحرم الذي دفعت فيه قلبك بالكذب ولا تضمنين رد فعل هذا الحبيب عندما يكتشف أنك كاذبة وخائنة ولا يمكن الوثوق فيك، فقد كنت تبادلينه الحب والمشاعر وفي أصبعك خاتم الخطبة وفي ذمتك خطيب ينتظر رجوعه ليتزوجك.

والنار الثانية: نار جوازك بعد شهر من واحد أقل منك في العلم فهو دبلوم متوسط وأنت مؤهلات عليا، وبالطبع تفكيرك ومستواك العلمي والدراسي لا يتناسب مع مستواه، يعني من الآخر مفيش تكافؤ، وكمان مفيش حب، ولا حتى احترام للفاتحة، والارتباط والجهاز اللي بتنزلي تشتريه وتتخيلي نفسك مع واحد مش من مستواك عليه.

والنصيحة صديقتي صعبة زي المشكلة وربنا يساعدك في تنفيذها، فهي هتكون "نار ثالثة" بس على ما أعتقد أحسن وأرحم من النارين اللي أنت بتتحرقي بهم الآن. على كلٍّ نصيحتي أنك تكبري دماغك من الاثنين وتبتدي من جديد على نضيف، يعني حرام تتجوزي واحد وبدل ما تتعسيه وتتعسي نفسك تتعسي أطفال صغار كمان مالهومش ذنب إلا أنك أمهم إللى وافقت تتخطب عشان انحرمت من حبها لواحد ماحسش بها.

وكمان حرام تفقدي حبك واحترامك لما يتخلى عنك حبيبك بعد ما يعرف إنك كذابة وخاينة ومستحيل يربط نفسه بواحدة كلامها كذب والأكيد مشاعرها كذب، إذن الحل هو أن تتركي الاثنين وتنتظري ابن الحلال اللي يكون من مستواك ويكون مؤهل عالي وحبوب كمان.

أو ترضي تعيشي مع واحد بجسمك وقلبك مع واحد ثاني، وساعتها هيكون العذاب ألوان لأنك هتفضلي منقسمة على نفسك، عينك على اللي في إيدك ومش بتحبيه، والعين الثانية على اللي قلبك معاه وإيدك مش طايلاه لأنه هيكون بقلبه وجسمه مع واحدة ثانية.