قصيدة جسام ياضنوتي مكتوبة للرادود جاسم النويني

جسّام يا ضنوتي ... رايح ... رايح امن اعيوني
ما رحمني الدهر أنته نور البصر
رايح
رايح من اعيوني
(1)
يوليدي تدري ابهذا گلبي انطعن ... بمصاب أبوك الحسن عگب الحسن
أنت الأمل ظليت أتاني الزمن ... لن اعله ثوب العرس تلبس چفن
تنيت الزمن و الأمل ... وينه ... يبني انخطف لوني
ودعتني اشبعد ... انتظر يا وعد
رايح
رايح من اعيوني
(2)
يبني برباك اتعبت حيلي انضهد ... محنية چنت اعليك فوق المهد
ينعدل ظهري فكرت يالولد ... و فگدت گلت انته الرجه و الضُمد
عرسك ابفكري حلِم ... يمته ... ابعرسك يبشروني
هذا حلمي صبح ... شو حزن مو فرح
رايح
رايح من اعيوني
(3)
جنت احسب اسنين العمر بالزغر ... و افرح ابكل سنةِ الجديدة التِمر
واثنعش يبني جمّعت لك عُمر ... هاي السنين اتعبت بيها اشكثر
لن ساعة وحده العده ... اسنينك ... منها يحرموني
دهري يبني اشلعب ... يبني كل التعب
رايح
رايح من اعيوني
(4)
يبني و لمن چنت بعدك طفل ... كلما اشوفك دمع عيني هِمل
يبني يتيم اليتم ما ينحمل ... حتى و لو عمك ابو ينجعل
و ربيت بين الأهل ... اهلك ... لجلك يحشموني
ما هويت الأهل ... و النجم لو أفل
رايح
رايح من اعيوني
(5)
و طلعت من بيتي على عزتي ... گلت ابني اگبالي وهو رجوتي
و بكربله حين انصبت خيمتي ... انته چنت يا ضنوتي شمعتي
بس انته يا بني صرت ... يمي ... وين اليودوني
سلوتي ابرجوتي ... يالترد وحشتي
رايح
رايح من اعيوني
(6)
حسباتي خلتني بمصيبة احس ... وردة شبابك خاف لن تنعفس
ابها الحالة و بحسبات هاي النفس ... لن تنصب أهلك الك حوفة عرس
لن أهلك اتباشرت ... يبني ... ابعرسك يهنوني
او لن عفت حوفتك ... قررت روحتك
رايح
رايح من اعيوني
(7)
عمّك ابو فاضل اجه ابفرحته ... و انصب لك الحوفه او نشر رايته
هذا علي الأكبر علگ شمعته ... اينادي جبتها الجاسم او زفته
ناديت من فرحتي ... امبارك ... أهلك يسمعوني
تالي صوتي ابتدل ... حسره دمعه همل
رايح
رايح من اعيوني